JASADIK-HOM
90 60 90 175 على 50
90 صدر 60 خصر 90 فخاد 175
طول ع 50 وزن هادول مقاييس جسدك
لازم يسموها جسدكهم
ال كاف تعود الك وجسدك يعود الهم
روح حرة داخل جسد غير حر
اخدلي وقت افهم جسدي جسدي الانثوي
جسدك بيروح بنام بغيب بغلط بتوب بنسامحه وبيرجع بعيد
للأبد ماشي مع ورقة تصريح من الطبيب
جسدي بكفي غلطة واحدة انزلاق واحد
صورة واحدة فيديو واحد
كم من عين في ع جسدي
كم وجه في لجسدي
جسدي انثوي جسدي عربي جسدي العربي الانثوي
كم ضمير في لجسدي
في أنا وفي إنت في إحنا وفي هم
هم ضد إحنا وإنت ضد أنا, الكل ضد أنا وأنا ضد الكل
حتى بالنضال عندي اضعاف من مسؤوليتكم
اذا انت بتقاوم بتمس في صهيونيتهم
اذا انا بقاوم بمس كمان بذكوريتهم
وقد ما جسدي واعي للقهر بيضل قابل للكسر
اخدلي وقت اتعلم اعشق جسدي جسدي الانثوي العربي
واقفة قبال المراي خلعت عن عيوني النظارات الإجتماعيه لإنهم صنع ذكوري
بدي اشوف عيوبي طريق عيوني
ضب عيونك هاد النهد إلي ضب ايديك هادا الفخد إلي
ضب ملاحظاتك شعر الإيدين وشعر تحت ال أباط بس إلي
سيطر ع تعابير وجهك هادول ال كم إكسترا كيلو إلي
السيلوليت إلي تشققات الجلد علامات الحمل بس إلي
الشيب التواليل الشامات ال وراك ال حبوب كله بس إلي
هاد المطبخ مش بس إلي بس هادا الزيت هادا الزعتر والعكوب إلي
بشرتي القمحية إلي وهاي العيون إلي
لأول مرة بشوف عيوني طريق عيوني
42 200 120 ع 136
42 مليون مرة تاجروا في جسدي
200 مليون مرة ختنوني واخدوا مسؤولية على جسدي
120 مليون مرة اغتصبوا جسدي
136 مليون ولادة بالسنة وهاي الحياة بس من جسدي