El Gareema El Shebh Kamla
- الجريمه الشبه كامله
كل شئ موجود في اوضتك، ليه اكيد دلوقتي قيمه
ذكرى من.. آخر ديسمبر، فازه م الشقه القديمه
وكدر ثابت في المرايه، وجوز تذاكر فيلم سيما
كل ركن كئيب في اوضتك، والخطوط المستقيمه
حتي تكشيرتك وطيبتك والنوايا المش سليمه
كل دي ادوات مناسبه وقت تنفيذ الجريمه!
- الضحيه
كل حاجه في مره فقدت روحها او مبقيتش هي
كل مشهد كان بيخرج عن سياق النص قاصد
او بيهرب م الدراما المنطقيه
كل واحده في مره ماتت جوه مني
او سابتني بموت وراها بحسن نيه
مش ضروري يكون اساسا في ضحيه
كل حاجه في الجريمه الشبه كامله
كات جريمه
كل شئ في الدنيا قابل للاذيه
- تهيئة الجو العام
دور علي كل منبه واظبطه ع الساعه اتنين
واقفل شبابيك الاوضه واتصاحب ع النيكوتين
علق برواز ع الحيطه وارسم صورتك جواه
بص لضلك واضحكله واتناقش حبه معاه
وكلام هيجر كلام... هيأت الجو العام
والساعه هتيجي اتنين... وهتتنفس معاناه!
- مرحلة ما قبل الجريمه
مش هتفرق طول ما ايدك ايد خفيفه
طول ما نظراتك بريئه ومش مخيفه
قول لنفسك اخر النكت السخيفه وابتسملك
ابتسم بسمة مجامله
واجهز نفسيآ جدا لجريمتك شبه الكامله
- وقت التنفيذ
لو جالك قلب تنفذ قبل التنفيذ بدقايق
دوب في القهوه منوم واسمع للصبر حدود
سيب جزء في عقلك فايق او باب روحك مردود
وادخل جواك بشويش... جرب كل الادوات
لازم تنهي اللي بدأته... من غير ما تسيب بصمات
العبره في اي جريمه... تركيزك في التفاصيل
ف اقتل نفسك لو امكن لكن متسيبش دليل!