Jäz
S'isch no kei Tag här - und i vermisse se scho
I ha no gseit; "de bis när" - u scho ghofft das sigi morn
Es isch e schöne Oobe gsy - mir zwöii aleini unger Lüüt
Si lächlet wie nes Meitschi - und gröhlet wie ne Typ
Si het ihre eiget Stiiu - isch kei Hippster Kopiie
Was d'Wäut vo ihre dänkt - isch ihre doch glyych
Ds Blitze i ihrne Ouge so ne Schlitzohr-zouber
Üsi Gschichte - ungloublech - wi mr üs jiz scho vertroue
S'isch ei Monet här - und i vermisse se no
Si het gseit; "s'git keis när" - u het mi eifach lo stoh
Si het sich umdräiiht, isch gange - aus wär gar nie öppis gsy
S'isch aus so schnäu gange - i ha ni verstange was passiert
Es isch e jesche Oobe gsy - mir beidei nööime angers
Hei üüs heilloos betrunke - bis mir üs nüm hei verstange
Mir hei beidii stuuri Chöpf - trage Schiiuder u Panzer
Üsi Härze si verletzt - Erwartige si Lanze
I ha so Angscht gha si z'verlüüre - si no meh vorem verbindlech
Mir heis nid gschafft üs z'füehle - üüs z'öffne für nes Villech
Es het nid "eifach" chönne sii - mir beidi viu z'verbisse
I üses Biud wie's müesst sii - nid fähig üs z'comitte
I gloub mir hättes gha - abr vrdammt mir heis lo goh
Mir hättes söue warha - jiiz ischs haut eso
Es isch scho viu z'lang häär - d'Erinnerige verschwümme
Ha gmeint heig di mou gseh - aber sicher bi mer nüme
Ha gmeint es sigi meh - aus paar Nächt unger Frömde
I ha gmeint oder ghofft - verdammt i weiss nümme
Wsi weis isch - dasi bis hüt nid ha vergässe
Ds mit dir wi Dehei isch - ds Gfüeu ohni Adrässe
Di Blick we'd verzeusch - gö dini Häng mit u du zeigsch
Drmit uf dini Seeu - o we' meinsch ds keni heigsch
Di Blick, dini Ouge - so töiiff wie dini Narbe
Dini Gschichte wo de gloubsch - i mög nur d'Heufti ertrage
Üsi Zyit, au die Stunde - die sächsedriissg Frage
Ws blybt, isch vrschwunde - e wyiteri Narbe
U mir gö wyiter wie immer - aus wär gar nüüt passiert
S'het nid wöue glinge - heis ou nid würklech probiert
U de stani plötzlech vor der - dräiih mi um u ga wyiter
I wett dr so viu gärn säge - doch i dräiih mi u las blybe
I gloube s'hätt passt - i weiss es isch jesch gsy
Mir heis beidi ni gschafft - si beidi nid bereit gsy
I gloub mir heis gfüeut - i weiss mir heis wöue
Mir hei us zäme vrirrt - wüu mrs alleini hei wöue
Mir hei üs zäme gägnang gwehrt - nur so und nid angers
Wüu mers haut eso hei gleehrt - gäbe mr Angerem ke Chance
Ds mer öppis vrpasse - wär Finge ohni Sueche
Wasi hüt angers würd mache - Riskiere und Luege
Jede Tag es nöiis Tüürli - di chly besser leere kenne
Züpfe und Brändy - u der ganz Sunnti verhänge
I has gnosse mit dir - i weiss i has vergäh
Chly vrschosse n'i di - i weiss i ga z'gäiih
Drum die paar Zile für dii - nimm di mit i mis Boumhuus
Vou im Fride mit diir - schad ghörsch nid zu mine Homies
I wett Usschniide mit diir - u mitz ir Nacht choche
Zäme n'allei sii - Zäme nid allei sii